Rian Bacalla Nagpakatawa sa "Rotational Brownout" Joke Niya sa Queen Universe Philippines 2026

Rian Bacalla Nagpakatawa sa "Rotational Brownout" Joke Niya sa Queen Universe Philippines 2026

Viral karon si Rian Bacalla, kanhi housemate sa "Pinoy Big Brother" ug nagrepresenta sa Cebu Province sa Queen Universe Philippines 2026, tungod sa iyang linya panahon sa iyang introduction sa finals night niadtong Dominggo, Septyembre 13, didto sa Mactan Expo Center.

Base sa report sa The Freeman gikan kang Januar Junior Aguja, gipakatawa ni Bacalla ang mga tawo sa venue sa dihang iyang gi-introduce ang iyang kaugalingon nga "representing from the rotational brownout capital of the Philippines — Cebu Province." Dali ra kaayo na-relate ang mga tawo tungod kay sakto gyud kini sa reyalidad sa mga Cebuano karon nga nag-antos sa dugay nga brownout schedule sa probinsya.

Wala mahunong didto si Bacalla. Human sa iyang show, mipost pa siya sa iyang Facebook account human niya nag-checkout sa hotel, diin iyang gi-caption nga "back to rotational brownout fantasy" na sad siya, ingon og pagbalik sa iyang naandan nga realidad.

Gigamit sad niya ang chance para mo-appeal sa mga electric companies nga i-improve ang serbisyo, kay para niya, naningkamot man ang mga tawo mo-trabaho aron lang makabayad sa ilang bayronon, pero ing-ani ra man diay ang serbisyo nga ilang madawat. Gitapos niya ang post nga nagpasabot nga padayon ra siya sa iyang "pagrampa" samtang bata pa siya.

Nagkalat dayon ang post niya sa social media — miabot na sa 2.3 thousand ang reactions ug 62 ka shares. Puno pud ang comment section sa mga supporter niya nga nag-congrats, uban ang mga komento nga "Congrats queen," "Congratulations sissy," ug "We love our callout queen." Naa sad mga netizen nga midayeg gyud sa iyang performance ug sa paagi niya og delivery sa iyang linya sa stage.

Samtang, gi-announce sad sa opisyal nga Facebook page sa Queen Universe Philippines ang Top 9 Finalists sa maong pageant, lakip ang mga representante gikan sa Isabela, Las Navas (N. Samar), Pampanga, ug Cebu City.

Gikan sa Facebook post ni Rian Bacalla ug sa report sa The Freeman.